QC Council sa DOTr: Ikonekta ang MRT7 Fairview station sa mixed use building na ginagawa sa lugar

Nagpasa na ng resolusyon ang Quezon City Council na humihiling sa Department of Transportation (DOTr) na ikonekta ang MRT 7-Fairview station sa isang mixed-use building sa Fairview para sa seguridad at convenience ng mga commuter.

Ang mixed-use building ay ang pinagsamang tatlo o higit pang istraktura sa iisang gusali tulad ng residential, retail, transportation terminal o parking.

Nakapaloob sa City Resolution 7874-2019, ang paghimok na gumawa ng covered walkway na kokonekta sa ginagawang MRT-7 station sa Fairview sa 33-storey commercial and residential building na ginagawa din sa lugar.

Ang paggawa ng proposed walkway ayon sa resolusyon ay dapat akuin ng building developer na RYS-Sons Holdings and Development Corporation.

Ang pagkonekta o pagdugtong sa MRT-7 Station ng mixed-use building ay hindi gagastusan ng gobyerno kundi ang developer lamang ng gusali.