PNP Chief, itinangging may kautusan siya na i-profile ang ACT members

Mariing itinanggi ni Philippine National Police  (PNP) Chief Director General Oscar Albayalde na may kautusan siya na i-profile ang mga miyembro ng Alliance of Concerned Teachers (ACT).

Ayon sa PNP chief, kung meron man isinagawang profiling, bahagi lang aniya ito ng regular na intelligence monitoring ng PNP.

Gayunpaman, ipinag-utos ng PNP chief ang pag-relieve sa mga intelligence Officers ng Manila Police District (MPD), Quezon City Police District (QCPD) at Zambales Police District na umano’y nag-leak ng memo tungkol sa naturang profiling ng mga ACT members, habang iniimbestigahan ng PNP ang isyu.

Ayon sa PNP chief, kung ang mga nag-leak ng memo ay involved sa intelligence operation, hindi dapat sila nagpapalabas ng sensitibong impormasyon na maaring makalikha ng pangamba sa mga mamamayan.

Inamin naman ng PNP chief na kahit sino ay mag-iisip ng hindi maganda kapag malaman na siya ay isinailalim sa profiling ng pulis.

Giit naman ni PNP Chief Albayalde na wala namang dapat ikatakot ang isang indibidwal sa profiling kung wala itong ginagawang masama.

Kaugnay nito, nag-rally sa tapat ng Camp Crame kahapon ang mga miyembro ng ACT para kondenahin ang naturang profiling na inihalintulad nila sa Union-busting.   | ulat ni Leo Sarne