Pimentel, pinasinungalingan ang pahayag ni dating Senador Jinggoy na inaalok umano siya ng PDP-Laban na mapasama sa senatorial line-up nito sa 2019 election

Tuwirang pinasinungalingan ni Senate President Koko Pimentel ang napalathalang ulat na ang kanyang partido na PDP-Laban ay nakipagnegosasyon di umano kay dating Senador Jinggoy Estrada, para mapabilang ito  sa administration ticket sa senatorial election sa susunod na taon.

Ayon kay Pimentel, na Pangulo ng PDP-Laban ay hindi totoo ang pahayag ni Estrada sa isang pangunahing pahayagan na umano’y may kinatawan mula sa administrasyon ang nag-alok sa kanya na maging bahagi ng administration senatorial line-up.

Diin ni Pimentel, walang naganap na pag-uusap, at walang balak ang administrasyon na kunin si Estrada para mapasama sa  ticket ng PDP-Laban.

Pero, sa bahagi ni Estrada,  ipinipilit pa rin nito na may tumawag sa kanya mula sa PDP-Laban at may mga nagaganap na pag-uusap.

Aminado naman ang dating senador na posibleng hindi lang umano alam ni Pimentel ang mga nangyayaring negosasyon.

Si Estrada ay pansamantalang nakalalaya, matapos na makapagpiyansa mula sa kasong plunder o pandarambong kaugnay ng umano’y  maling paggamit ng kanyang pork barrel funds. | via Jojo Ismael