Petisyon na ibalik sa Manila International Airport ang pangalan ng NAIA, isinumite ni Atty. Larry Gadon sa Malacañang

Dapat ng ibalik ang Ninoy Aquino International Airport sa dati nitong pangalan na Manila International Airport.

Ito ang iginiit ni Atty. Larry Gadon sa media forum sa Quezon City, kasabay ng pahayag na naisumite na niya sa Malacañang ang petisyon na may libu-libong electronic signatures mula sa change.org website.

Ayon kay Gadon, mas kilala ang Manila International Airport kumpara sa NAIA na ipinangalan sa dating Senador Benigno Ninoy Aquino Jr. at mas kinakatawan nito ang Pilipinas sa international community.

Dagdag pa ni Gadon, masama na ang imahe ng NAIA dahil nasira ang reputasyon nito nang mapabilang sa World’s Worst Airport. Bukod dito ay nasangkot din ang NAIA sa laglag-bala scam.

Sinabi rin ng abogado na hindi sapat na ipangalan kay Ninoy ang naturang airport dahil paborable lamang ito sa mga Aquino at isa pa hindi naman naging Pangulo ng bansa si Ninoy.

Taong 1961 nakilala ang Manila International Airport pero pinapalitan ito noong 1987 sa NAIA ni dating Pangulong Cory Aquino. | via Rey Ferrer