Non-appearance COVID test, pinaiimbestigahan ni PNP Chief

Inatasan ni Philippine National Police (PNP) Chief General Guillermo Eleazar ang Criminal Investigation and Detection Group (CIDG) at Anti Cyber Crime Group na imbestigahan at i-track down ang mga nagbebenta at bumibili ng pekeng COVID-19 test result.

Partikular na tinukoy ng PNP chief ang modus ng non-appearance RT-PCR test kung saan magbabayad lang ng isang libo ang kliente, at iisyuhan na siya ng negatibong RT-PCR test result nang hindi magpapa-swab.

Kadalasan aniyang ginagamit ang ganitong swab test sa pag-biyahe.

Babala ng PNP chief, ang ganitong modus ay nagdudulot ng panganib sa public health sa posibleng pagkalat ng COVID-19.

Hinimok ni Eleazar ang mga nabiktima ng ganitong modus na mag-report sa mga awtoridad.

Habang yung mga kusang-loob na bumili ng pekeng COVID test, ay kasama aniya ng mga nagbebenta nito na makukulong kapag sila ay mahuli.