Nilalaman ng Urban Dictionary, maituturing na inaccurate, defamatory — PCOO

Kinundena ng Presidential Communications Operation Office (PCOO) ang depinisyon ng Urban Dictionary sa pangalang ‘Duterte’.

Ginamit kasi ng Urban Dictionary ang mga salitang scam, traydor at iba pang negatibong salita bilang kahulugan dito.

Ayon kay PCOO Secretary Martin Andanar,
ang nilalaman ng Urban Dictionary ay nagmula lamang sa mga indibidwal na mayroong access sa kanilang website.

Wala aniya itong sinusunod na panuntunan, gabay at moderators kaya’t maituturing na hindi angkop at mapanira ang mga contributions o nilalaman nito.

Bilang bahagi ng kampaniya ng PCOO na tuldukan ang disinformation, binigyan-diin ng kalihim ang magandang feedback ng publiko sa Pangulo.

Halimbawa ang pinakahuling resulta ng SWS survey kung saan lumalabas na 80% ng mga Pilipino ay kontento sa pamamalakad ni Pangulong Rodrigo Duterte, habang 85% naman ang nagtitiwala sa kaniyang pamununo base sa survey ng Pulse Asia.

Kaugnay nito, hinihikayat ni Secretary Andanar ang lahat na ipagpatuloy ang pagiging aktibo at malaya, at isaalang-alang ang responsibilidad na kaakibat nito, hindi lamang para sa mga Pilipino kundi para rin sa Pilipinas.