Gender sensitivity sa pag-uulat, ipinanawagan ng PCOO sa media

Ipinanawagan ni Presidential Communications Operations Office (PCOO) Assistant Secretary Anna Marie Rafael-Banaag sa media na maging mas gender-sensitive sa kanilang pag-uulat.

Sa isinagawang Real Numbers Forum Year 2 sa Camp Crame kahapon, sinabi ni Banaag na isang “Gender-fair Media Guidebook” ang ipapamahagi ng PCOO sa mga miyembro ng media para maiwasan ang mga maituturing na “sexist” terms sa kanilang mga pag-uulat.

Inihalimbawa ni Banaag na imbes na gamitin ang terminong “cameraman” maaring gamitin nalang ang terminong “camera operator” o “videographer.”

O kaya’y sa halip na tawaging “mediamen” ang mga miyembro ng media, maari namang “Journalists” ang gamitin para mas gender-neutral.

Kasama din sa handbook ang mga “politically correct” terms na dapat gamitin sa pag-uulat para maging mas-sensitibo sa mga subject ng report.

Halimbawa aniya, sa halip na sabihing galing sa isang “broken home” ang isang subject ng istorya, maaaring sabihin nalang na ito ay galing sa “restructured family.”

Ayon kay Banaag, maaaring natatatawa ang mga miyembro ng media sa ilang mga termino sa guidebook, pero ito ay makakatulong para maging mas “non-sexist” at mas patas ang kanilang pag-uulat. | ulat ni Leo Sarne